18 октябрьыште книгагудыштына кок кугу событий лийын: В.Х.Колумбын литературно-мемориальный пӧлемжым почмо да традицийыш пурышо Самырык тукымын XIII-шо лудмашыжым эртарыме.

Кажне ийын эртаралтше вашлиймашыште Марий Элысе книгагудо пашаеҥ-влак деч посна Коми да Татарстан Республикыласе книгагудо специалист-влак погыненыт.

Мутланымашын темыже — «Книгагудо цифровой пагытыште: вияҥме корно». РФ тӱвыра министерстве цифровой технологийын вияҥмыжлан тӱткышым ышта, тудыжо тӱвыра да шинчымаш аланыште ятыр йодышым кораҥден кертшаш. Вашлиймашыште  книгагудылаште кумдан кучылталтше технологий-влакым презентоватлыме: мутлан, RFID-технологийым кучылтмаш, лудшо-влаклан ЛитРес коллекций гыч книга-шамычым темлымаш да молат. 

Мероприятий мучашыште книгагудо-влак коклаште эртыше «Илыш — наркотик деч посна» лӱман республиканский смотр-конкурсым иктешленыт. Тиде конкурс «Комплексные меры по противодействию злоупотреблению наркотиками и их незаконному обороту на 2013-2020 гг.» республиканский целевой программе почеш эртаралтын. Тудын организаторжо семын В.Х.Колумб лӱмеш Республикысе йоча да самырык-влаклан книгагудо лийын. Конкурсын лауреатше семын Моркысо рӱдӧ книгагудо, Хлебниковысо модельный книгагудо, Йошкар-Оласе рӱдӧ книгагудо-влак палемдалтыныт.

---