Мемнан илышна экономике дене моткоч чак кылдалтын. Экономикым тунеммаш мер илышыште лийын шогышо экономика йодышым решатлымаште моткоч кӱлешан. 10 апрельыште книгагудышто Торгово-технологический колледжын студентше-влак Россий Федерацийысе профессионльный образованийын сулло пашаеҥже, ПГТУ-со экономика да финанс кафедрын доцентше, экономика наука кандидат Эмилия Моисеевна Гамова дене вашлийыныт. Эмилия Моисеевна экономика сферыште ятыр лекций, публикацийлаж дене палыме. Тудо тӱрлӧ ийлаште «Марийская правда», «Молодежный курьер», «Известия Марий Эл» газетлаште экономический обозреватель семын пашам ыштен. Марий радиом колыштшо-влаклан «За чашкой чая об экономике» программым вӱдышӧ семын палыме. Йоча-влак вашлиймаш годым «Деньги и их история» темылан оҥай лекцийым колыштыныт, презентаций ден «История рубля» видеофильмым онченыт. Нуно ятыр ум пален налыныт, кызытсе экономика проблеме дене кылдалтше йодыш-влакым пуэденыт. Э.М. Гамова йодыш-шамычлан куштылго да умылаш лийше йылме дене вашештен, экономика наука нерген тӱҥалтыш умлымашым пуэн.

 

---