Республикысе йоча да самырык-влаклан книгагудышто А.М.Горькийын «Изи сарсий» йомакшым каҥашен лудмаш лийын. «Росток» йочасадын изи ӱдыр-рвезыже-влак  пален налыныт: 28 мартыште чапланыше руш писательлан 150 ий темеш. Тудо йоча-влакым моткоч чот йӧратен да возымо ятыр поизведенийжым лач нунылан пӧлеклен. 

Йоча-шамыч чыла палаш тӧчышӧ Пудик лӱман изи сарсий нерген йомакым кугу кумыл дене колыштыныт. Нуно шулдыран йолташын койыш-шоктышыжым, мом ыштылмыжым каҥашеныт да йодыш-влаклан вашештеныт. Икшыве-влак изи кайыкын аважын икшывыж верч азапланымыже, лӱддымылыкшӧ  нерген ойленыт. Вет тудо шке шочшыжым чоя пырыс деч утарен. Каҥашыме деч вара йоча-влак иктешлымашым ыштеныт: ача-аван мутшым колышташ кӱлеш, нуно шочшылан эре сайым гына шонат.

Вашлиймаш мучаште чыланат сарсийлан пӧлеклалтше модыш-влак дене модыныт.

---