А.Н. Толстойын «Шӧртньӧ сравоч, але Буратинын приключенийже-влак» йомакышкыже изи лудшо-влак оҥай путешествийым ыштеныт. Нуно сылнымут модыш гоч йомак-повестьын кузе шочмыж нерген, тора Италийыште пу гыч ыштыме Пиннокио куклын историйже нерген пален налыныт.
Тӱрлӧ чарак гоч эртен, йоча-влак Шӧртньӧ сравочым кычалаш тарваненыт. Ондак ятыр туштылан вашмутым кычалыныт, «Айста шарналтена» викторным эртеныт, эсогыл Ужаван рольжымат модын ончыктеныт. Вара шке моштымашыштым «Лум кышкена», «Пазлым пого», «Йомшо арверын мешакше» модыш-влакыште вийыштым тергеныт. Нунылан «Колым кучымаш» модыш эн чот келшен, туштыжо «Шӧртньӧ колым кучыман улмаш. Чыла чаракым эртыме! Сеҥыше-влаклан Дуремар сравочым шылтыме шкатулкым кучыктен.
Теве тыгай оҥай модыш полшымо дене йоча-влак весела да шотым муын моштышо Буратино нерген пален налыныт. Тиде историй йоча чонышто куаным шочыкташ, ваш келшен илаш да сайлан ӱшанаш туныкта.