Кызытсе пагытыште  шӱкым утилизоватлымаш кугу экологический проблеме семын ончалтеш. Икмыняр шӱдӧ ий ончыч Английыште мануфактур пеш кумдан шарлен. Кок шӱдӧ ий гыч тыгыде мануфактур-влакым кугу предприятий-шамыч ушеныт, куштыжо машин-влак айдеме вийым алмаштеныт. Тидыже кумда технический прогресслан кугу шӱкалтышым ыштен. Чаманен каласыман, тыгай прогрессын уда могыржат уло. Нунын кокла гыч иктыже — мландым коштыра да шӱк дене амыртымаш.

 Тиде кугу экологический проблемылан «Шӱкым погаш жап!» йыргешке ӱстелым погымо ыле. Тудо книгагудышто 19 октябрьыште лийын.

Тушко Йошкар-Оласе округын Экологий да пӱртӱс дене пайдаланыме шотышто комитетын специалистше Мария Владимировна Лоскутова, шӱкым посна погымо шотышто толкынын активистше Зульфия Харитовна Коржавина, Торгово-технологический колледжын 1-ше курсышто тунемше студентше-влак да СМИ гыч еҥ-влак лийыныт. Книгагудын пашаеҥышт-влак мультимедийный презентацийым ончыктеныт, книга ончерым чумыреныт. Йыргешке ӱстелын участникышт-влак шӱкым эрыктыме шотышто ятыр йодышым каҥашеныт.

2017 ий Российыште Экологий идалык семын эрта. Ӱшанена, тидыже экологий проблемым кунар-гынат решатлаш полша.

---