Икымше сентябрьыште элнан кажне тунемшыже Шинчымаш кечым пайремла. Тидын годым икымше урокын темыже — Тӱнямбалсе тыныслыкым аралыме теме.

Тиде мотор да шокшо кечын книгагудышкына Торгово-технологический колледжын студентше ден Бауманский лицейын тунемшыже-влак толыныт ыле. Нунылан «Карелий гыч Урал марте» этнографический экскурсым эртарыме.

Россий Федераций – шуко национальностян эл, куштыжо 140 наре тӱрлӧ калык ила. Писын вашталтше тӱняште  кажне калык шкенжым арален кодаш да вес калык денат кылым кучаш тырша. Финн-угор калык-влакын тыгай негызше — йылме икгайлык. Тачысе кечылан финн-угор йылмыла дене 26 млн. наре еҥ мутлана.

Мероприятий жапыште тунемше-влак финн-угор группысо 16 калыкын традицийже дене палыме лийыныт, тӱнямбалне улшо моло национальность коклаште ойыртем ден икгайлыкыштым рашемденыт. Тыгодым шуко калыкан Российыште тыныслыкым аралыме йодыш эн тӱҥ  верыште лийын.

Тӱрлӧ калыкын историйже, йӱлаж дене палыме лийын, ме воктен улшым пагалаш да аклаш тунемына.

---