Виртуал ончер-влак Электрон каталог Аклыммут

Мландын кечыже

DSC05423-1 22 апрельыште Тӱнямбалне Мландын кечыже палемдалтеш. Тиде пайрем уло калыкым йырым-йыр улшо пӱртӱсым аралаш ӱжеш. Мемнан книгагудынат ӧрдыжеш огеш код. Самырык тукым йыр улшо мландым шинчасорта семын арален кушшо манын, ме тӱрлӧ йӧным кучылтын, пашам ыштена. 76-шо номеран йочасадыш коштшо икшыве-влак «Пӱртӱсын тушто тӱняже» лӱман Мландылан пӧлеклалтше экологический викториныште вийыштым тергеныт. Вашлиймаш модыш йӧн дене эртен. Йоча-влак пӱртӱс дене кылдалтше ятыр йодышлан чын вашмутым кычалыныт. Викторинын геройышт-влак Куэ, Кутко, Изеҥер, Айболит ден Коля ӱдыр-рвезе-влаклан экологий нерген шуко каласкаленыт, пайдале ой-каҥашым пуэныт.


«Кечын клатше» ончер-кроссворд

IMG_0949

«Кечын клатше» ончер-кроссворд йоча-влакым шочмо пӱртӱсым ончал савырнаш ӱжеш. Тудым Йомак пӧлемыште вераҥдыме. Весела тушто-влак изи лудшо-шамычым янлык, кайык, кушкыл-влак нерген шарналташ таратат. А лудын моштышо йоча-влак шкештак тӱрлӧ тӱсан кагаз гыч чын вашмутым оптен кертыт.

Ончерыште пӱртӱс нерген возышо писатель-влак: М. Пришвинын, И. Соколов-Микитовын, В. Бианкин, Е. Чарушинын, К. Паустовскийын, Б. Житковын, Б. Заходерын, Н. Сладковын, Г. Скребицкийын, Г. Снегиревын да молынат книгаштым вераҥдыме. Кажне ойлымаш але почеламут — тӱрлӧ урын, мераҥын, шоҥшын веле огыл илышышт гыч налме оҥай историй-влак…

«Кечын клатше» ончер-кроссворд — йоча-влакым пӱртӱс нерген палдарыше сай книга-влак веле огыл, тыгак ача-ава-шамычымат тора йоча пагытыш наҥгайыше вер. 

 Книгагудыш пагален ӱжына!


Тазалык элым кычалмаште

DSC05342-1

Тазалык — мемнан тӱҥ поянлыкна! Тидын нерген эреак шарнаш манын, 1950-ше ий гыч кажне гана 7 апрельыште Тӱнямбал тазалык кечым пайрем семын палемдаш пунчалме.

6 апрельыште книгагудышто «Тазалык элым кычалмаште» лӱман модыш-путешествий эртен. Йошкар-Оласе 1-ше номеран школышто тунемше йоча-влак тазалыкым рвезынек аралаш, пайдале кочкышым кочкаш, зарядкым ышташ манме шонымашым ушышкышт пыштеныт манын ӱшаныме шуэш.


Книга — шонымаш корабль

DSC05220«Книга – воштончыш, чӱчкыдынрак тушко ончал».

Калыкмут

 Таче книга шӧрлык-влак ятыр у сылнымут дене пойдаралтыныт. Шуко книга кокла гыч сайракшым кузе ойырен мошташ? Самырык лудшо ден кӱлешан книгам кузе ваш ышташ? Кызытсе автор-влакын сай книгашт дене палдараш манын, книгагудышто «Сай книган шагатше» обзор-презентаций лийын. 


«КАЙЫК ӰЖЫН УЖАТА»

DSC05224-1

Кумдан палыме марий литератор Юрий Михайлович Артамоновын юбилейже вашеш книгагудышто «Кайык ӱжын ужата» ончер-шарнымашым ямдылыме.

Юрий Артамонов – марий сылнымут тӱняште ик эн талантан писатель семын палыме. Тудо — ятыр книган авторжо, Олык Ипай лӱмеш кугыжаныш премийын лауреатше, СССР писатель ушемын еҥже. Ю. Артамоновын книгаже-влак Казахстаныште, Мордовийыште, Удмуртийыште савыкталтыныт. Писатель тӱрлӧ жанр дене пашам ыштен: драматический, лирический, документальный, юмористический да сатирический произведений-влакым возен. Шке творчествыштыже Юрий Михайлович калык ойпогым моштен кучылтын, садлан тудын возымо йылмыжат муро гай йоҥга.

Писатель икшыве-влакымат монден огыл. Нунылан ятыр ойлымашым пӧлеклен да «Ямде лий» газетыште, «Пионер йÿк» («Кече») журналыште, «Эрвий» альманхыште савыктен. Ю.А. Артамонов «Изи Вичу» (1976), «Тарля кован кудывечыже» (1992) да моло сборникымат ош тӱняш луктын. Тений писательын шочмыжлан 80 ий темеш. Ме тудым порын шарнена да лудшына-влакым творчествыж деке уэш пӧртылаш ӱжына.

Книгагудыш пагален ӱжына!


Майн Ридын кышаж дене

DSC049921818 ий 4 апрельыште английский писатель, йоча-влаклан приключенческий роман-влакым возышо Томас Майн Рид шочын. 200 ий эртен гынат, «Капитан Майн Рид» книган авторжо  самырык тукым коклаште тачат палыме да йӧратыме.

Майн Ридым ни школышто, ни университетыште огыт туныкто гынат, тудым сылнымутым йӧратыше-влак моткоч сайын палат.

«Охотники за скальпами», «Квартеронка», «Морской волчонок», «Оцеола – вождь сименолов», «Вольные стрелки», «Белый вождь» да ятыр моло романже-влак чын лийше событий негызеш возалтыныт, вет автор 1846-1848 ийласе Мексиканский войнам шке шинчаж дене ужын.

Нине изданий да эше вес книга-влакымат апрель тылзе мучко мемнан книгагудышто «Майн Ридын кышаж дене» лӱман книга ончерыште муын кертыда.

«Всадник без головы» — М. Ридын эн чапланыше произведенийже. Кодшо курым покшелне Техасыште ыштыме преступленийым почмо сюжет лудшо еҥым пытартыш слог марте сымыстарен шога. Йӱдым кудалше вуйдымо имнешке деч чылан лӱдыт. Кӧ тудо? Шинчалан койшо чон, ия але айдеме? Те але огыда пале? Книгам почса да пален налза!


«Шӱмсавыш»: поэт Г.Оярлан — 60!

DSC05206 - копия

Пеле-пула толашыл ом чокие,

А пӱтынь ямым чон денак айлен

Да шижын тыйын ӱжара гай вийым,

Марий йылмем, мый тый денет ойлем!

Калык поэт Г.Л. Сабанцевын (творческий псевдонимже Ояр) 60 ияш лӱмгечыж вашеш краеведений пӧлемыште «Шӱмсавыш» лӱман книга ончерым сӧрастарыме. Тушко авторын илышыж ден творчествыж нерген каласкалыше литературым чумырымо. А марий поэзийым йӧратыше-влаклан Геннадий Оярын у почеламутшо-влакым лудаш сай йӧн уло.

Геннадий Леонидович — Марий Эл Республикын сулло журналистше, Россий писатель ушемын еҥже, «Чытамсыр курым», «Нумалтыш», «Шӱмсавыш», рушла савыкталтше «Всполохи сердца», «Светом единым» сборник-влакын авторжо. Шке почеламутлаштыже Г.Ояр лудшо-влак дене тыглай мутланымашым тарвата, кудыжо кажне еҥлан пеш лишыл да шерге: йӧратымаш, шочмо вер, еш, икшыве нерген… Да эреак — порылык, умылымаш кумыл дене пырля.